Piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutaat nr. 17, 12. november 2001-imeersoq.
(Piginneqatigiilluni inissiat annertussuserisaasa ilaat tapiiffigineqarsinnaatitaasut kiisalu m2-imut akii kiisalu piginneqatigiilluni inissiaatileqatigiiffimmut taarsigassarsiassanik piffissaq tunniussivissaq)
§ 1.
Piginneqatigiilluni inissiat pillugit Inatsisartut peqqussutaanni nr. 1, 31. oktober 1991-imeersumi Inatsisartut peqqussutaatigut nr. 11, 6. november 1997-imeersukkut allanngortinneqarsimasumi makku allannguutigitinneqassapput:
1. § 10, imm.1, imatut oqaasertalerneqassaaq:
" Naalakkersuisut kommunalbestyrelsillu tamarmik immikkut erniaqanngitsumik akilersugassaanngitsumillu taarsigassarsisitsissutigissavaat sananermut aningaasartuutit tapiiffigineqarsinnaatitaasut tamarmiusut 1/3-ii, tak. § 11. Taarsigassarsiat qularnaarneqassapput peqatigiiffiup illuutai tammarnaveeqqusiullugit aammalu iluarsiivigineqartassallutik Kalaallit Nunaanni sanaartornermi aningaasartuutit allanngorarfiat malillugu."2. § 10, imm. 2 imatut oqaasertalerneqassaaq:
"Imm. 2. Inissianut § 1, nr. 1-imi pineqartunut taarsigassarsiarititassat tunniunneqartassapput inissiat inaarsarneqarnerisa kingornagut aammalu taamaallaat atuisinnaatitaalernermut allagartap uparuaavigineqarsimanngitsup takutinneqarneratigut. Inissianut § 1, nr. 3-mi pineqartunut taarsigassarsiassat siusinnerpaamik tunniunneqarsinnaapput inissiat inaarsarneqareernerisa kingornagut atuisinnaatitaalernermut allagartap uparuaavigineqarsimanngitsup takutinneqarneratigut, aammalu taamaallaat piginneqatigiilluni inissiaatileqatigiiffimmut pilersinneqareersimasumut peqqussutip aalajangersagartaasa sinnerinik naammassinnissimasumut inissiat tunniunneqarnerinut atatillugu."3. § 11 imatut oqaasertalerneqassaaq:
"§ 11. Piginneqatigiilluni inissiat sanaartukkatut quleriiaatut imaluunniit sanaartukkatut eqimasutut/pukkitsutut sananeqartassapput. Immikkut ittumik pisoqartillugu ataasiakkaartunik imaluunniit marloqiusanik illuliornissaq Naalakkersuisut pisinnaatitsissutigisinnaavaat.
Imm. 2. Naalakkersuisut kommunalbestyrelsillu § 10, imm. 1, malillugu taarsigassarsisitsissutissaat tunniunneqarsinnaapput piginneqatigiilluni inissiap inigisassartaata annerpaamik 105 kvadratmiiterianut, tassa piginneqatigiilluni inissiarluunniit anginerugaluarpat, aammalu sananermut aningaasartuutinut tamarmiusunut kvadratmiiterimut annerpaamik 15.000 kr.-inut, tak. § 13.
Imm. 3. Piginneqatigiilluni inissiaq angissusissamit annerpaamik tapiiffigineqarsinnaatitaasumit angineruppat aamma/imaluunniit taassuma sananeqarneranut aningaasartuutaasut sananermi aningaasartuutissat tapiiffigineqarsinnaatitaasut annerpaaffissaat, tak. imm. 2, qaangersimappatigik, inissiap ilaanut aamma/imaluunniit sananermut aningaasartuutinut tapiiffigineqarsinnaatitaanngitsunut sananermut aningaasartuutit tamarmiusut piginneqatigiilluni inissiaatileqatigiiffiup taarsigassarsineratigut imaluunniit ilaasortat inissiamut atuisinnaatitaasussat immikkut ittumik aningaasaliissuteqarnerisigut aningaasalersorneqassapput
Imm. 4. Piginneqatigiilluni inissiap angissusiata tapiiffigineqarsinnaatitaalluni annerpaamik angissuserititassaq, tak. imm. 2, qaangersimappagu, inissiap kvadratmeterimut akia naatsorsorneqassaaq inissiap sananeqarneranut aningaasartuutit tamarmiusut inissiap kvadratmeteriisa tamarmiusut amerlassusiannut naleqqiunnerat aallaavigalugu agguaqatigiissitseriaaseq tunngavigalugu.
Imm. 5. Piginneqatigiilluni inissiaatileqatigiiffiup imm. 3 naapertorlugu taarsigassarsiarisai Naalakkersuisut kommunalbestyrelsillu § 10, imm. 3, naapertorlugu taarsigassarsiarititaasa tulleriinnerisa kingornaniillutik inissisimassapput.
§ 2.
Inatsisartut peqqussutissaat una atuutilissaaq ulloq 1. januar 2002. Peqqussutissaq Piginneqtigiillutik Inissiaatileqatigiinnut 2001-imut siusinnerusukkulluunniit Inatsisartut Aningaasanut Inatsisaannut ikkunneqareersimasunut sunniutissanngilaq.
Imm. 2. Piginneqatigiilluni Inissiaatileqatigiiffik 2001-imut siusinnerusukkulluunniit Inatsisartut Aningaasanut inatsisaannut ikkunneqarsimasoq imaluunniit Inatsisartut Peqqussutissaata matuma atuutilerfissaa sioqqullugu taarsigassarsinissamik neriorsorneqareersimasoq Namminersornerullutik Oqartussanut kommunalbestyrelsimullu nalunaaruteqarnermigut toqqarsinnaavaa Inatsisartut Peqqussutissaata matuma § 1, imm. 1, nr. 3-anut naapertuuttumik piginneqatigiilluni inissianik sananissap aningaasalersuiffigineqarnissaa.
Namminersornerullutik Oqartussat, ulloq 12. november 2001.
Jonathan Motzfeldt/
Jørgen Wæver Johansen